ނަޒަރު: އެމެރިކާގެ ޤައުމީ އިންޓެލިޖެންސްގެ ޑިރެކްޓަރ ތުލްސީ ގައްބާޑް އިއްޔެ ފަޅާއަރުވާލި ކޮވިޑްގެ ކަޅު ފޮށީގެ ފަހަތުގައިވާ އަނދިރި ހަގީގަތް

އެ އަނދިރި ދުވަސްތަކުގެ ހިތްދަތިކަން އަޅުގަނޑުމެން އެންމެންގެ ހަނދާނުގައި އަދިވެސް އެބަހުއްޓެވެ. އަމިއްލަ ހަށިގަނޑުގެ މައްޗަށް އޮތް އިޚްތިޔާރު ނިގުޅައިގަނެ، ގަބޫލުނުކުރާ ވެކްސިނެއް ޖެހުމަށް އާންމު ރައްޔިތުންނަށް މަޖުބޫރުކުރުވިއެވެ. އެކަން ނުކޮށްފިނަމަ ވަޒީފާ ގެއްލި، ދަތުރުފަތުރުކުރުމުގެ މިނިވަންކަން ގެއްލި، މުޖުތަމައުން ބާކީވާނެކަމުގެ ބިރުދެއްކިއެވެ. ގިނަ ބަޔަކަށް މިއީ ހަމައެކަނި ސިއްހީ ކަމެއް ނޫނެވެ. މިއީ ދީނީ، އިޖްތިމާޢީ، އިޤްތިޞާދީ، އަޚްލާގީ އަދި އިސްތިޤުލާލީގޮތުންވެސް ކުރިމަތިވި ވަރަށް ބޮޑު ގޮންޖެހުމެކެވެ. ވެކްސިންތަކާއި ވައިރަސްގެ އަސްލާ ގުޅޭގޮތުން އުފެދުނު ބިރުވެރިކަމާއި ޝައްކުތަކުގެ އަޑުތައް އުފުލުމުން، އެމީހުންނަށް ކުރީ މަލާމާތެވެ. އަމިއްލަ ދީނާއި ހަށިގަނޑު ރައްކާތެރިކުރަން އުޅުނު މީހުންނަށް އަމުރުކުރީ އަނގަބަންދުކޮށްގެން ތިބެ ބޯލެނބުމަށެވެ. ޓެރަރިޒަމްގެ ތުހުމަތާއި އެހެންމީހުންގެ ފުރާނައަށް ނުރައްކާ ކުރަނީ ކަމުގައިބުނާ އެކި ތުހުމަތުން މީޑިއާ އޮތީ ފުރާފައެވެ.

ނަމަވެސް، އެތައް މިލިއަން ބައެއްގެ އަޑު ކަނޑުވާލާފައި ވަނިކޮށް، މިއަދު މިވަނީ އެ ހިތްދަތިކަމުގެ އަޑީގައިވާ ހަގީގަތްތައް ފަޅާއަރަން ފަށާފައެވެ. ސީދާ އެމެރިކާގެ ޑިރެކްޓަރ އޮފް ނޭޝަނަލް އިންޓެލިޖެންސް ވަނީ އިއްޔެ މި ބޮޑު އޮޅުވާލުންތައް ފަޅާއަރުވާލައްވާފައެވެ:

[އިއްޔެ، އެމެރިކާގެ ޑިރެކްޓަރ އޮފް ނޭޝަނަލް އިންޓެލިޖެންސް (ޑީއެންއައި) ގެ ގޮތުގައި ހޭދަކުރެއްވި އެންމެ ފަހު ދުވަހު ނެރުއްވި ވަރުގަދަ ބަޔާނެއްގައި ތުލްސީ ގައްބާޑް ވަނީ ތާރީޚީ ބަދަލެއް ގެނުވާފަދަ ބޮޑު ކަންތައްތަކެއް ފަޅާއަރުވާލައްވާފައެވެ. ރަސްމީ ލިޔެކިޔުންތަކެއް ޑީކްލެސިފައިކޮށް (ސިއްރުގެ ދަރަޖައިން އުނިކޮށް)، ކޮވިޑް-19 ގެ ބަލިމަޑުކަން ފެށުމަށް މެދުވެރިވި ދިރާސާތަކަށް ފަންޑުކުރުމުގައި ބައިވެރިވިކަމުގެ ސީދާ ތުހުމަތު، ނޭޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑިޒީޒަސްގެ ކުރީގެ ޑިރެކްޓަރ މެޑިކަލް ޑޮކްޓަރ ޑރ. އެންތަނީ ފައުޗީ ގެ މައްޗަށް ވަނީ ކޮށްފައެވެ. އަދި ދުނިޔެއަށް އޮޅުވާލުމަށް ހިންގި ބޮޑު “ފޮރުވުމުގެ ރޭވުމެއްގެ” އިސް މޭސްތިރިއަކީ އޭނާކަމަށް ވަނީ ތުހުމަތުކޮށްފައެވެ.

މި ރިޕޯޓަކީ އެމެރިކާގެ ރައްޔިތުންގެ ޓެކްސް ފައިސާއިން މިލިއަނުން ޑޮލަރު ޚަރަދުކޮށްގެން، ޗައިނާގެ ވޫހާން އިންސްޓިޓިއުޓްގައި ނުރައްކާތެރި “ގޭން-އޮފް-ފަންކްޝަން” ދިރާސާތަކެއް ކުރުމަށް ފައުޗީ މަގުފަހިކޮށްދެއްވިކަން ހާމަކޮށްދޭ ވަރުގަދަ ދައުވާއެކެވެ. މިއަދު މި ރިޕޯޓުން ބުނާ ގޮތުން ގޮތުގައި، ލެބޯޓަރީން އެކިޔާ ވައިރަސް “ނުވަތަ ކެމިކަލް ވިހައެއް” ލީކުވުމުގެ ކާރިސާއަށް މެދުވެރިވީ ހަމަ އެ ދިރާސާތަކުގެ ސަބަބުންނެވެ.

މި ރިޕޯޓު ހަމައެކަނި ފަންޑުކުރުމުގެ މައްސަލައަކުން ނިމުނީކީ ނޫނެވެ. ކޮންގްރެސްގައި “ހުވާކޮށްގެން ހުރެ ދޮގުހެދި” ކަމުގެ ސީދާ ތުހުމަތުވެސް ފައުޗީއަށް ވަނީ ކޮށްފައެވެ. އަދި ސަލާމަތީ އިދާރާތަކުގެ ތެރޭގައި ތިބި ސިޔާސީ ނުފޫޒުގަދަ ފަރާތްތަކާ ގުޅިގެން، ލެބޯޓަރީން ވައިރަސް އުފެދުނުކަމަށް ބުނާ ތިއަރީ ނައްތާލުމަށާއި، ވައިރަސްއާއި އެމެރިކާގެ ފަންޑިންގއާ ގުޅުވާ ކޮންމެ އަޑެއް ކަނޑުވާލުމަށް ގަސްތުގައި އޮޅުވާލުމުގެ ރިޕޯޓުތަކެއް ތައްޔާރުކުރިކަމަށްވެސް ވަނީ ތުހުމަތުކޮށްފައެވެ.

މި ލިޔެކިޔުންތަކުން ހާމަވާ ގޮތުގައި ސައިންސްވެރިންނާއި އެނަލިސްޓުންނާ ދެކޮޅަށް ފަރުދާގެ ފަހަތުގައި “ވަރުގަދަ ހަނގުރާމައެއް” ވަނީ ކޮށްފައެވެ. ހަގީގަތް ހާމަކުރަން އުޅުނު އިންޓެލިޖެންސް ދާއިރާގެ މުވައްޒަފުންނަށް ބިރުދައްކައި، ވަޒީފާއިން ވަކިކޮށް، އެކަހެރިކޮށްފައިވެއެވެ.

ވަރަށް ހަރުކަށި އިބާރާތަކުން ތުލްސީ ގައްބާޑް ވިދާޅުވީ: “ކަންކަން ފޮރުވުމުގެ ޒަމާން މާޒީވެއްޖެ” ކަމަށެވެ. އަދި ސިއްރު ލިޔެކިޔުންތައް ހާމަކުރުމަކީ ފުރިހަމަ ދެފުށްފެންނަ ގޮތެއް ގާއިމުކުރުމަށް ލިބުނު ކާމިޔާބީއެއް ކަމަށާއި، މިއީ ދުނިޔޭގެ އެތައް މިލިއަން ބައެއްގެ ފުރާނައިގެ އަގުގައި ބޮޑެތި ފާމަސޫޓިކަލް ކުންފުނިތަކުގެ މަސްލަހަތާއި ކޮރަޕްޓް ލީޑަރުން ހިމާޔަތްކުރުމަށް ހަގީގަތް އޮޅުވާލި ނުފޫޒުގަދަ ވިއުގައެއް ބޭޒާރުކޮށްލުންކަމަށް އޭނާ ވިދާޅުވިއެވެ.

ފާހަގަކޮށްލަންޖެހޭ ކަމަކީ، ޖެނުއަރީ 2025 ގައި ކުރީގެ ރައީސް ޖޯ ބައިޑަން މަގާމުން ވަކިވުމުގެ ކުރިން، އެއްވެސް ޝަރީއަތަކުން ނުވަތަ ދައުވާއަކުން ފައުޗީ ހިމާޔަތްކުރުމަށްޓަކައި ދުރާލާ ރިޔާސީ މައާފެއް (ޕްރެޒިޑެންޝަލް ޕާޑަންއެއް) ދެއްވާފައިވާކަމެވެ.]

ނަމަވެސް އަޅުގަނޑުމެންގެ ތެރެއިން ގިނަ ބަޔަކަށް، މި އޮޅުވާލުންތަކުގެ އަޑި ވޫހާން ލެބަށްވުރެ މާ ފުންކަމަށް އިހުސާސްކުރެވެއެވެ.

އެކިޔާ ވައިރަސް އުފެދުނު ގޮތުގެ ރަސްމީ ވާހަކަތަކަށް އަޅުގަނޑުމެންނަށް އަޞްލު ގަބޫލެއް ނުކުރެވެއެވެ. މިހާރު ހާމަވެފައިވާ މި “ހަގީގަތް” ވެސް ސިފަވަނީ ހަމަ ބޮޑު އޮޅުވާލުމެއްގެ އެއް ބައިގެ ގޮތުގައެވެ. އަސްލު ހަގީގަތަކީ، މުޅި މެޑިކަލް އެސްޓަބްލިޝްމަންޓާއި ވައިރޮލޮޖީގެ ބިންގާ ގުޅިފައިވަނީ ބޮޑެތި ފާމަސޫޓިކަލް ކުންފުނިތަކުގެ ބިލިއަނުން ގުނާލެވޭ ފައިސާގެ މަންފާއާއެވެ. އެމީހުން ބޭނުންވަނީ ކަންކަން ސިއްރުކޮށްގެން ތިބެ، އެމީހުން ދައްކާހާ ވާހަކައެއް އާންމުން ކަނުބަނދެގެން ގަބޫލުކުރުމަށެވެ. ކޮންމެ ފަހަރަކު އާ ވައިރަހެއް “ހޯދައިފި” ކަމަށް ބުނެ، އެ ވައިރަހަކީ ބައްޔެއްގެ އަސްލުކަމަށް ކަނޑައަޅައި، އޭގެ ނަމުގައި ވެކްސިނެއް އުފައްދައިގެން މި ކުންފުނިތަކުން އިންތިހާއަށް ފައިދާ ނަގައެވެ.

މިއީ ތާރީޚުގައިވެސް ކަން ހިނގާފައިވާ ގޮތެވެ. ޑީޑީޓީ، ލެޑް، ނުވަތަ ކެމިކަލްތަކުގެ ސަބަބުން އެތައް ބަޔަކު މަރުވެ ދިޔައިރުވެސް، ބާރުގަދަ ކުންފުނިތަކުން މަސައްކަތްކުރީ އެކަން ފޮރުވުމަށެވެ. ސިނާއީ އަދި ބަޔޯކެމިކަލް ވިހަތަކުގެ ސަބަބުން މީހުން މަރުވަމުންދާކަން އެއްބަސްވުމުގެ ބަދަލުގައި، އެމީހުންނަށް މާ ފަސޭހަވީ އެއީ ލޮލަށް ނުފެންނަ “ވައިރަހެއްގެ” ސަބަބުން ވާކަމެއްކަމަށް ބުނެ ރައްޔިތުންނަށް އޮޅުވާލުމަށެވެ. މިގޮތަށް ކަންތައް ކުރުމުން، ކެމިކަލްތައް އުފައްދާ ކުންފުނިތައް ސަލާމަތްވުމުގެ އިތުރުން، ބޭސް އުފައްދާ ކުންފުނިތަކަށް އެމީހުންގެ ވެކްސިންތައް ވިއްކުމަށް ދާއިމީ މާކެޓެއް އުފެދިގެންދެއެވެ.

އަޅުގަނޑުމެންނާ ދެކޮޅަށް އެމީހުން ދޫކޮށްލި ކަންތައްތަކުގެ ފުރިހަމަ ހަގީގަތް ދުވަހަކުވެސް ނޭނގިދާނެއެވެ. ސަބަބަކީ މިކަންކަން ތަހުގީގުކޮށް އާންމުންނާ ހަމައަށް ގެނެސްދޭން ތިބި ފަރާތްތައްވެސް ވަނީ ގަނެލެވިފައި ކަމަށް ވުމެވެ. އަޅުގަނޑުމެންނަށް މިއަދު ފެންނަމުންދާ ހަގީގަތަކީ، އާންމުކޮށް ގިނަ ބަޔަކު ދަންނަ ބޮޑެތި މީޑިއާތައް ވަނީ މެޑިކަލް އެސްޓަބްލިޝްމަންޓުން ގަނެފައިކަމެވެ. އެ މީޑިއާތަކުން މަސައްކަތްކުރަނީ ސީދާ އެ ފަރާތްތަކަށްޓަކައެވެ. އެމީހުންގެ ބޭނުމަކީ ބޮޑެތި ފާމަސޫޓިކަލް ކުންފުނިތަކުގެ މަސްލަހަތު ހިމާޔަތްކޮށް، ހަގީގަތް ހޯދަން އުޅޭ މީހުންގެ އަޑު ކަނޑުވާލުމެވެ.

އެމީހުންގެ އޮޅުވާލުންތަކާއި، ފައިސާގެ ދަހިވެތިކަން މިއަދު މިވަނީ ފަޅާއަރާފައެވެ. އެމީހުން ދިން ޒަޚަމްތަކަށް ފަރުވާ ހޯދުމަށް އުމުރުދުވަސް ނަގާނެއެވެ.ނަމަވެސް، ގަނެވިފައިވާ ނިޒާމަކަށާއި މީޑިއާތަކަށް އެއްވެސް ސުވާލެއްނެތި ބޯލެނބުމުގެ ޒަމާން މިއަދު މާޒީވެއްޖެއެވެ.

އަލަށް ސިއްރުކަން ނައްތާލި ހެކިތައް

23 އޭޕްރީލް 2026 ގައި އޯޑީއެންއައި އިން އާންމުކުރި ޔޫކްރެއިންގައިވާ އެމެރިކާގެ ބަޔޮލޮޖިކަލް ލެބޯޓަރީތަކާ ގުޅޭ ސިއްރު ލިޔެކިޔުންތަކަށް ބަލާލުމުން، އަޅުގަނޑުމެންގެ ހިތްތަކުގައިވާ ޝައްކާއި އިތުބާރު ނެތްކަން އިތުރަށް ޔަގީންވެގެންދެއެވެ. މި ލިޔެކިޔުންތަކުން ކަށަވަރުކޮށްދޭ ގޮތުގައި، އެމެރިކާގެ ޑިފެންސް ޑިޕާޓްމަންޓާއި ބްލެކް އެންޑް ވީޗް ފަދަ ކުންފުނިތަކުން ވަނީ ޔޫކްރެއިންގެ 40 އަށްވުރެ ގިނަ ލެބޯޓަރީއަކަށް އެތައް މިލިއަން ޑޮލަރެއް ޚަރަދުކޮށްފައެވެ. އަދި މި ލެބޯޓަރީތަކުގައި ކުރީގެ ސޯވިއެޓް ޔޫނިއަންގެ ޒަމާނުގެ ނުރައްކާތެރި ކަމަށް އެމީހުން ކިޔާ ވައިރަސްތައް ރައްކާކުރުމުގެ އިތުރުން، އެންތްރެކްސް، ސާރސް، އީބޯލާ އަދި ނުރައްކާތެރި ކަމަށް ބުނާ އޭވިއަން ފްލޫ ފަދަ “ޚާއްސަކޮށް ނުރައްކާތެރި ކަމަށް ބުނާ ޕެތޮޖެންތައް” ގެނެސް، އެތަކެތީގެ ދިރާސާތައް ކުރަމުންދެއެވެ.

މި ލެބޯޓަރީތަކަކީ ހަމައެކަނި ދިފާއީ އަދި ވެކްސިން އުފެއްދުމަށް ބޭނުންކުރާ ތަންތަންކަމަށް ރަސްމީ އިދާރާތަކުން ބުނެ، މިއީ ބަޔޮލޮޖިކަލް ހަނގުރާމައަކަށް ތައްޔާރުކުރާ ތަންތަންކަމަށް ބުނާ ބުނުމަކީ “ރަޝިޔާގެ ދޮގު މައުލޫމާތު” ކަމުގައި ރިޕޯޓުތަކުގައި ލިޔެފައިވީ ނަމަވެސް، ފެންނަން އޮތް ހަގީގަތަކީ ބިރުވެރި ހަގީގަތެކެވެ. އާންމު ރައްޔިތުންނަށް މަޖުބޫރުކުރުވި ގާނޫނުތަކުގެ ހިތްދަތިކަން ތަހައްމަލުކުރި މީހުންނަށް، ބޮޑެތި ޑިފެންސް ކުންފުނިތަކުން ސިއްރު ލެބޯޓަރީތަކެއްގައި ދުނިޔޭގެ އެންމެ ނުރައްކާތެރި ކަމަށް ބުނާ ވައިރަސްތައް ގެންގުޅޭ މަންޒަރު ފެނުމުން، އެމީހުންގެ ޝައްކުތަކަކީ ސައްހަ ޝައްކުތަކެއްކަން ކަށަވަރުވެއެވެ. މިއީ ދިފާއީ ކަމެއްގެ ގޮތުގައި ސިފަކުރި ނަމަވެސް، ފަރުދާގެ ފަހަތުގައި ނުރައްކާތެރި ކަމަށް ބުނާ ވައިރަސްތަކާ ކުޅެމުންދާކަމެވެ.

DNI Gabbard Reveals Evidence of U.S. Taxpayer-Funded Global Biolab Program